Favoris du mois De FEVRIER مفضلاتي لشهر فبراير

أهلا جميلآتي

مرحبا بيكم فأول تدوينه لي باللهجه المغربيه وبلغتنا العربيه

و كذلك اول موضوع غدي نهدر فيه على مفضلاتي واليوم غيكونو مفضلاتي لشهر فبراير

كنتمنى يعجبكم وتستمتعو معايا فهاد التدوينه

دآبا غدي نبداو بصوره عائليه للمستحضرات اللي كانو من ضمن مفضلتي لشهر فبراير

-نبداو بالتفصيل في المستحضرات

اول مستحضر هو جل منظف للبشره و ممكن نقولو مزيل للمكياج من ايف روشي

طبعا اغلبيتكم كيعرفووه .. كيصلح لجميع انواع البشره

عجبني حيث كينضف مزيان وريحته زوينه و اهم شي انه من مواد طبيعيه

كنستعمله تقريبا كل يوم بالليل.

- المستحضر الثاني هو كريم اليدين من ايف روشي حتى هو

الكريم خديته في بدايه فبراير .. واستعملته طوال الشهر .. كيرطب وحتى هو بالبابونج وانا كتعجبني ريحته بزاااف

- المستحضر الثالث اللي فالصوره هو كريم للجسم واليديم من او بي اي

كنتو شفتوه خديناه من مازون

الصراحه احسن كريم استخدمته فحياتي لحد الآن .. كيرطب البشره كيخليها بحال البشره ديال الآطفال الصغارين

كنستعمله للجسم وحتى ليدي بعض الآحيان .. ريحته لذيذه ههه

-ومن سكين فوود عندي فالمفضله المرطب.. زوين كيرطب البشره .. كنستعمله اغلب الآوقات على شنيفاتي قبل ما ننعس

كيرطب مزيان وخصوصا مع هاد الجوديال دابا

-هنا غدي نبدا بمستحضر مكنستغناش عليه اللي هو كريم الآساس ديال جيورداني من اوريفلام

كنستخمده هادي فتره كبيره ومقديتش نستغنى عليه .. علاش؟

حيث كيوافقني .. هو مكيغطيش 100 في 100 ولكن اللي كيعجبني فيه كيغطي بواحد النسبه معقوله وكيخلي الوجه يبان زوين

بطريقه طبيعيه .. واللون اللي كنستخدم مناسب مع وجهي .. انا كنستخدم light ivory

- نجيو للمستحضر الثاني فهاد الصوره اللي هما البيرل ههه معرفتش كيفاش نقولها ولكن كنضن هما اللألئ البرونزيه وفيها اللي لونهم وردي .. 

اللون اللي كيعطيه على الخدود او الحنيكات هه زوين بزاف .. واهم حاجه مكيتسالاوش هه يعني كيدوم لفتره طووويله وصالح تستخدميه كل الآوقات .. للجامعه والخدمه وللخرجات مع صحباتك وكلشي

نجيو للمناكير ههه زعما بالمغربيه الصباغه يعني طلآء الآظافر

اول واحد هو الازرق الغامق شويه من كاتريس سميته Hip Queens wear blue Jeans!

اللون الثاني من تشكيلة مايبلين الآخيره .. اللون هادي وزوين .. وكيصلح انني نديرو فوقت الجامعه وديكشي

سميته Mauve Kiss

والديسولفون هه كضحك الكلمه .. لا زعما مزيل طلآء الآظافر من ايسونس . كيعجبني غير انه كيحيد الصباغه مزيان 

انه ريحته زوينه وكتعجبني اي حاجه ريحتها زوينه.

- بالنسبه للشفاه .. مفضلاتي لهاد الشهر جوج

روج او عكار وجلوص او لامع للشفاه

العكار لونه زوووين كيفما شايفين و اللي كيعجبني فيه انه كيبقا مده طويله و هو لونه قوي شويه 

ولكن انا كنخففه مكنديرش بزاف منه

العكار من اوريفلام سميته Garnet Attraction

هذا الجلوص من ايسونس

لونه وردي فاتح و جممميل هه

اللي كيعجبني فيه انه لآمع ههه الطبيعي انه يكون لامع زعما قصدت انه لونه مكيجيش قوي يعنيي فاتح و لمعانه قوي

حيث اصلا 3 اكس ال شاين هههه

هنا سميته

جينا للفرش المستخدمه فهاد الشهر واللي كانو من ضمن مفضلاتي

اول فرشه هي من كاتريس .. كنستخدمها لتحديد رسمة العين .. يعني كنقاد بيها الكحل وحتى كندير بيها الآي لاينر

- ثاني فرشه هي فرشه من اوريفلام للاي شادوو

فيها جوج جيهات 

- الفرشه الثالثه من الف

contouring eye brush

- حبيبي الصغير هه قلم الكحل ديالي

من اوريفلام .. طبعا هذا اكثر حاجه كنستخدمها .. لدرجه انه رجع صغير هه قرب يختفي ههه

اخر لمسسسه ... الماسكارا

من الضروريات طبعا لكل بنت و انا كنستخدم ماسكارا Wonder Lash Intense

لهنا نكون وصلت لاخر موضوعي ساليته 

كنتمنى تكون التدوينه عجبتكم واستمتعتو معايا

كيفما انا استمتعت باني نهدر بلهجتنا الزووينه

ومتنساوش تقولولي رايكم واقتراحاتكم وتقولولي شنو هما مستحضراتكم المفضله لشهر فبراااير

Be Close

xoxo