Wednesday, March 21, 2018

تجربتي في الشراء من موقع Tartecosmetics.com

السلام عليكم ورحمة اللة وبركاته
من فترة درت حساب بنكي خاص للشراء من النت وخصوصا من المواقع الاجنبيه.
وكنت شفت على الصفحه ديال سحر ان موقع 
Tarte cosmetics
كيدير التوصيل للمغرب،المشكل اللي كان ان التوصيل غالي كيوصل ل 170درهم ،ايلا خلصتي التوصيل كيطلع عليك المنتج بثمن غالي.
المهم استنيت حتى دارو على صفحتهم عرض توصيل مجاني في انحاء العالم و عاد خديت منتجين باش نجرب الموقع لاول مره.




العرض اللي دارو هو توصيل مجاني و -50٪ على المنتج الثاني.
انا خديت منتجات بحجم صغير نجربها و اصلا غالبا مكنساليش المنتجات ههه يعني الحجم الميني زوين ليا باش نجرب و نساليهم ههه.

*اول حاجه خديتها هي هاد المجموعة فيها علبة مكياج  كونتور و هايلايت و ماسكارا، و احمر الشفاه او عكار سائل لونه nude.




الثمن ديالها رخيص بزاف بصراحه لا يتجاوز 210درهم
لوكان خديتها من عند البائعات لوكان الثمن مضاعف جوج او ثلاثة المرات.



*المنتج الثاني اللي خديت هو هاد جوج عكورا بحجم صغير ،جوج الوان مختلفين و زوينين و حتى هما غير لامعين.



سعرهم كان 100 درهم و مع العرض اخدتهم ب 50درهم فقط تخيلو معايا.



*المنتج الثالث اللي هو عباره عن عينة ديال كريم الاساس الجديد ديالهم اخدتو ب 9 دراهم.

زوين بزاف وفيه كمية كافيه باش نجرب المنتج ونشوف واش يعجبني ايلا بغيت ناخدو.
يعني طلبيتي كلها السعر ديالها 269 درهم فقط و الشحن مجاني و المنتج الثاني بنصف الثمن.
المنتجات وصلوني جوج اسابيع فقط بعد الطلب، درت الكوموند يوم 25 فبراير و وصلتني يوم 9 مارس و جاتني حتى لدار.
منين دق ساعي البريد استغربت حيث متوقعتش تكون هي الطلبيه اللي وصلتني.
المنتجات جات فبوكس زوين بزاف و كلشي مغلف مزيان و تغليفهم زوين بزاف.
مع الطلبيه كيعطيوك كود خصم ديال 15٪.
بصراحه غير زعمو و خودو من عندهم الاسعار فالمتناول والمنتجات رائعه،الحاجه الوحيده اللي ننصحكم بيها هي تراقبو الموقع او حسابهم على انستغرام باش تشوفو العروض اللي كيديرو واستناو حتى يكون شحن مجاني عاد طلبو باش توفرو عليكم داك 170 درهم ديال التوصيل.
نتمنى موضوع يكون عجبكم
اي استفسار خليوه وانا نجاوبكم واكيد غيكون مقال جديد فيه رأيي فالمنتجات من بعد ما نجربها مزيان.
متنساوش تابعونا على 

Monday, February 19, 2018

Vaseline Racine Vita عشر استعمالات مهمه للفازلين

اهلا حبيباتي
بما انه فصل الشتاء والجو بارد كنحتاجو ترطيب اقوى
ومنين كنفكرو فالترطيب والشتاء اكيد كيجي فبالنا الفازلين
الفازلين هو عبارة عن ماده نفطيه كتجي على شكل جل هلامي،كينتج على عملية تكرير النفط.
اللي كنستعمل انا هاد الفترة هو هاد الفازلين من Racine Vita بنسمة الخيار،فيه ريحة فحال الخيار تماما مكتحسيهاش صناعيه، وكنت جربت كذلك بالبرتقال حتى هو ريحته زوينه،ترطيب زوين واللي عجبني اكثر ان الحجم كبير و الثمن رخيص ومناسب (18درهم)

واليوم غنقدم لكم مجموعة ديال الاستعمالات ديال الفازلين اللي خاص تعرفوها واللي مفيده جدا


نجيو دبا لاستعمالات الفازلين واللي هي كثيره ومتعدده:


*أول واهم حاجه للقدمين: مع هاد البرد الرجلينركينشفو ويرجعو فيهم خشونه زايده , لذلك الحل البسيط والسهل هو انكي قبل النوم دهني رجليك بالفازلين ومن ثم ارتدي التقاشر (الجوارب) فالصبح غتلقاي رجيلاتك اكثر نعومه ومترطبين مزيان.

*الاكواع والركب جتى هي من الاماكن الجافه ففصل الشتاء,دكشي علاش متنسايش مره مره تدهنيهم وترطبيهم بالفازلين.

*للشفاه: تقدري تستعمليه للتقشير والترطيب, باش تحولي الفازلين لمقشر يكفي تاخدي منه كميه كافيه وتزيدي عليها القليل من حبيبات السكر (سنيده) وتقشري الشفاه ديالك من بعد مسحيهم بقطنه ورطبي بشوية فازلين.

*الاظافر: كاملين عندنا مشكل منين كنوضعو طلاء الاظافر كنخرجوه على الاظافر وكنوسخو الجلد المحيط بها وخصوصا ايلا كنتو بحالي اليد اليمين ديما مخربقه هه,لذلك اسهل حاجه قبل ماتديري طلاء الاظافر هو انك تستعملي الفازليين على الجلد المحيط بالظفر ومنين تسالي كتمسحيه عادي بقطنه وكيبقا محيط الاظافر نقي.
فنفس الوقت ممكن تستعمليه لترطيب الجلد المحيط بالاظافر cuticule.

*ايلا مكانش عندك هايلايتر تقدري تصنعيه بنفسك،غتاخدي فرشه و تديري شويه الفازلين على الوجنتين ديالك او اي مكان بغيتي ديري فيه الهايلات و تاخدي اي ايشادو او ظل جفون لامع و تعمليه من فوق المكان لي درتي فيه الفازلين و غدي تلاحظي قوة الاضاءه فحال ايلا استعملتي هايلايت.

*ايلا نسيتي يوما ما انه مزيل المكياج الخاص بكي انتهى ما عليكي غير تاخدي قطن و تديري فيه القليل من الفازلين و تمسحي المكياج .

*يستخدم من بعد ازالة شعر الجسم ب la cire , حيث كتكون البشرة قابله للتهيج والاحمرار وهو كيخفف من هاد الاعراض و كيحمي البشره.

*ايلا كنتي كتعاني مع حواجبك اللي شعيراتها غير ثابته كل ماعليكي هو انكي تطبقي شويه الفازلين على حواجبك و تمشطيهم كيف مابغيتي وغتلاحظي ثباتهم.

*يستخدم كذلك لثبات العطر،طبقيه فقط فالمكان اللي بغيتي يثبت فيه العطر ومن بعد رشي عليه العطر وغتلاحظي العطر كيدوم اليوم كله.

* اذا كنتي من الفتيات اللي عندهم البيبي هير الي كيبقاو طايرين و كيضيعو منظر الشعر ،فالفازلين اسهل حاجه لتثبيتهم و يعطيوك لوك مرتب.


نتمنى تكونو استفدتو من الموضوع ونال اعجابكم
الى اللقاء

Tuesday, December 26, 2017

Ma Routine Capillaire : ORGANICS BY AFRICA'S BEST | روتيني للعناية بشعري

السلام عليكم ورحمة الله وبركاته


عزيزاتي موضوعي لليوم غنتلكلم فيه على روتين شعري او المنتجات اللي نستعمل هاد الفترة لشعري.
المنتجات كلهم من ماركة Africa's Best.
الماركة أمريكيه انشأت سنة 1924
من أقدم ا لماركات المختصه بالعنايه بالشعر و الجسم,انا عن نفسي عرفت الماركة بالمنتوجات ديال الشعر ديالها اللي الكل كيشكرهم. الماركة اسمها فالاساس House of Cheatham ومن بين الماركات اللي تنتج Africa's Best و argan smooth , aunt jackies ..و مجموعة كبيرة اخرى.


قبل مانتكلم لكم على الروتين خاص تعرفو طبيعة شعري , شعري مموج ولكن ماشي حرش وكرد .
الزغبه عندي رقيقه وشعري متتضرر بسبب الصباغه.

دبا نقدرو نهدرو على الروتين:



المهم فروتيني كنبدا ب cream therapy هو عبارة عن كريم مكون اساسا من زيت الزيتون البكر الممتاز,غني بالفيتامينات ومستخلصات الاعشاب و الزيوت.
الكريم خاص للشعر الجاف جدا و فروة الرأس الجافه جدا, المفروض يستعمل كل يوم على الشعر وكتديرو بيه مساج خفيف على فروة الرأس ونذهن باقي الشعر.
بالنسبالي شعري ماشي جاف لدرجة انني نستعمله كل يوم لذلك كنستعمله مرة فالاسبوع قبل الاستحمام, يا اما كنخليه ساعه فشعري او فبعض الاحيان كنستعملو قبل بيوم.

ريحته زوينه غير مزعجه وبصراحه كيخلي الشعر رطب وايلا كان شعرك دغيا كيتعقد فهاد الكريم كيسهل عليك تسريحه.
بالنسبالي عجبني بزاف بزاف ساعد شعري لانني كنت كنعاني مع شعري اللي تحول لجاف جدا بعد الصباغه, حسيت بفرق فشعري ومبقيتش كنتعذب فالتسريح ديالو.


ثاني خطوة كندير كتكون تحت الشاور واللي هي الشامبو كنستعمل الشامبو من نفس المجموعه organics, الشامبو صالح لجميع انواع الشعر ,مفيهش شي ريحه مميزه , بالنسبه لرأيي فيه عجبني كيغسل الشعر مزيان وكينظفه, كانت عندي شوية القشرة مبقاتش واهم حاجه انه هو مدارش ليا القشرة حيث هذا من المشاكل اللي كنت كنلقا مع الشامبوو ,رغم انه ينظف جيدا الا انه مكينشفش الشعر لدرجة تحتاحي ملين من بعده يعني خطوة الملين ممكن الاستغناء عليها.



ثالث خطوة واللي مكنديرهاش دائما هي Hair mayonnaise من نفس المجموعه والغني عن التعريف حيث كلنا سمعنا عليه ودابا اخيرا متواجد فالمغرب, هاد مايونيز الشعر غني بالفيتامينات, زيت الزيتون البكر, مستخلصات الاعشاب وبروتينات البيض.
يستعمل يلين ويرطب ويقوي الشعر المتضرر جدا جدا, يعني البنات ايلا شعرك عادي فمغديش يفيدك بزاف.
نرجع لتجربتي معاه, انا جربتو بعدة طرق ,استعملته قبل الاستحمام واستعملته كملين من بعد الشامبو وكنظيفو للماسكات والخلطات اللي كنستعمل لشعري.
رأيي انه خاص يكون شعرك جاف بزاف باش تستعمليه بالطريقة اللي مكتوبة على العلبه حيث ممكن يخلي لك الشعر ميدم, افضل استعماله مع الخلطات او كماسك قبل الاستحمام كيخلي الشعر نازل ورطب مكيبقاش منفوش وجاف.
بصراحه من بعد فترة من اتباع هاد الروتين مبقيتش محتاجه نستعمله على شعري كله دابا كنستعملو فقط على الاطراف.


اخر منتج فالروتين هو هاد créme bfillance , اللي كيجي فعلبه عندها pshit pshit, الماده سائلة زيتيه ولكن خفيفه معندهاش نفس قوام الزيت , يعني متخافيش مغديش يردلك شعرك ذهني.
كنستعملو انا من بعد الاستحمام ومن بعد ما كينشف شعري من الماء , كيعطي لمعان للشعر والملمس ديال الشعر كيرجع رطب وكينقصلي داك النفشه اللي كتكون فالشعر ملي كينشف.,بالاضافه كيخلي ريحه زوينه فالشعر.
تقدرو تستعملوه حتى على الشعر المبلل.

والمشط اللي كنستعمل سبق وتكلمت عليه هنا , مكينتفش الشعر كيسرحو مزيان.
بالاضافه لهاد المنتجات بين فترة والاخرى كندير خلطات وماسكات طبيعيه اللي كنشاركها معكم على الفيسبوك وانستغرام.

فالاخير انا جد راضيه على هاد الروتين حيث وافقني بزاف وارتحت من ناحية شعري بزاف, البنات اللي شعرها مثل شعري او شعرها جاف جدا كنصحها تجرب هاد المنتجات حيث فعلا يستاهلو.

(رأيي الصادق وتجربتي شاركتها معكم)

نتمنى تكونو استفدتو من الموضوع
ومتنساوش متابعتنا على

Sunday, October 15, 2017

ميلاني كريم اساس رخيص وتغطيه كبيرة | Milani conceal+perfect foundation

السلام عليكم ورحمة الله وبركاته

بعد غياااب رجعت لكم بموضوع جديد عن كريم الاساس او الفاونديشن من ماركة ميلاني.
توصلت بيه من فترة طويلة وجربتو بزاف تقريبا هو اللي استعملت طوال فترة الصيف.



كيفما كتشوفو كيجي فقرعة زجاجيه من 30مل,والجزء العلوي ديالو عبارة عن بلاستيك اسود والماده تخرج من بومب.
هاد كريم الاساس المفروض يكون 2 في 1 كريم اساس وكونسيلر,تغطيته من متوسطه لكامله, كيجي منه حوالي 19 لون من الفاتح للغامق, مناسب للبشرة المختلطة الى ذهنية بالنسبه للبشرة الجافه لازم ترطيب عميق قبله.

اللون اللي عندي هو 01 Creamy vanilla مناسب للون بشرتي , الماده ديال كريم الاساس خفيفه شويه الشي اللي يسهل استخدامها ودمجها على البشرة, استعملتو مع الاسفنجه اللي من السيليكون والاسفنجه العاديه وكذلك الفرشه وكيتدمج بيهم مزيان .

جربتو ك كونسيلر ولكن فضلتو كريم اساس احسن حيث حسيت الماده اخف من اني نستعملها تحت عيني.
اللي زوين فيه انك تقدري تبنيه يعني تديري طبقة فوق الاخرى لتغطية اكثر,واهم حاجه فيه انه كيغطي ولكن فنفس الوقت كيعطي لوك طبيعي للبشره بلاماتحسي انك مستعمله شيحاجه ثقيله على وجهك.


تقدرو تلقاوه ف فيرجن ميجاستوروحتى فمحلات المكياج.
غتلقاو تفاصيل اكثر فصفحة الماركة على الفيسبوك هنا
بالنسبه للسعر مكيفوتش 150درهم على حسب البائع.


نتمنى موضوعي يكون عجبكم

Related Posts Plugin for WordPress, Blogger...