Monday, May 15, 2017

[REVUE]Jordana Sweet Matte-أحمر الشفاه من جوردانا

*


السلام عليكم حبيباتي
اليوم غنتكلم لكم على احمر الشفاه من ماركة جوردانا
كنت توصلت بلونين من الماركه لون فاتح ولون غامق

نبدا باول حاجه هو شكلهم, عباره على علبه صغيره الغطاء او الفرشه لونها اسود
العلبه من الاسفل شفافه والكتابه باللون الابيض
الشفافيه كتمكنا من رؤيه اللون ديال احمر الشفاه



كيفما كتشوفو فالصوره اللون الاول اللي عندي هوStrawberry cheesecake
جاي لون وردي كوراي زوين بزاف ومناسب لفصل الربيع والصيف
اما اللون الثاني هو Sweet marsala wine
لون احمر غامق بورجندي زوين بزاف مناسب خصوصا لفصل الشتاء
طبعا عرفتو باللي لوني المفصل هو الفاتح ههه



الفرشه ديالهم كيفما كتشوفوها فالصوره كتجي مقوسه من الفوق وفيها بحال شعيرات صغيره,سهله الاستخدام وكتهز كميه كافيه من المنتوج.
الماده بحد داتها سائله و كتبان من تمريره وحده على الشفاه, تقدري تستخديها على الشفاه بدون مرطب بالنسبالي منشفوش ليا الشفاه ديالي.
 تاخد تقريبا 2 دقائق لتجف كليا وهدشي بالنسبالي نقطه ايجابيه حيث كتمكنك من انكي تعدلي وتزيدي لمسات الاخيره قبل ما تجف الماده كليا وترجع matte
بالنسبه لي عجبني الثبات ديالهم كيبقاو فترة زوينه ولكن مع الاكل كيبدا اللون يتمسح من الشفاه خصوصا من الجهه الداخليه.




الثمن ديالهم رخيص بالمقارنه مع الجوده ديالهم
تقدرو تلقاوهم ف virgine megastore او عند les parfumeries

نتمنى الموضوع يكون اعجبكم
نتلاقاو فموضوع اخر قريبا


Saturday, April 15, 2017

اضرار الشمس وكيفية الحمايه منها مع DAYLONG

اهلا و سهلا بنات

موضوعنا اليوم موضوع جدي بزاف ومهم, حيث اليوم مغديش نهدر فقط على منتج ولكن غدي نهدرو على موضوع يهمنا كلنا خصوصا مع بدايه هاد الفصل والشمس اللي بدات.
اكيد عرفتو علاش غنهدر , على الشمس واضرارها على بشرتنا,وكيفاش نحميو نفسنا منها وغنقدم لكم المنتج اللي كنستخدم .


*اول شي لازم نعرفوه هو ان الشمس رغم فوائدها الاانها تقدر تضر الجلد,الاشعه فوق بنفسجيه ضارة جدا بالجلد واللي تقدر تسبب اضطرابات خطيرة فيه.

*تعرضنا للشمس بدون وقايه يزيد نسبه ظهور علامات الشيخوخه المبكرة, مثل التجاعيد وغيرها.

*الشمس تقدر تعرضنا بسببها لخطر الاصابه بسرطان الجلد "عافانا الله واياكم منه" اللي هو يعتبر من اكثر انواع السرطان خطوره واللي فالغالب يؤدي للوفاة.

*ومن الاشياء اللي تقدر تصيب الجلد ديالنا بكثرة التعرض لها بدون حمايه :الحساسيه والتهيج ويمكن الجلد يتصاب بحروق,وبلا مانسى البقع الداكنه تصبغ الجلد او"الكلف".

اظن من بعد هاد المعلومات اي بنت معندهاش عذر تتعرض للشمس بدون حمايه,حافظي على بشرتك وصحتك.
انا عارفه بااللي الكثيرات مكيبغيوش واقي الشمس حيث كيرجع الوجه ذهني ويتلصق ولكن لا هدشي مبقاش,دبا كاينين منتجات اللي كتجي خفيفه على البشرة وكترطبها وكتحميها فنفس الوقت,ومن بين هاد المنتجات هو واقي الشمس اللي غنتكلم لكم عليه اليوم.

منتجي اليوم هو Daylong اللي كنستعملو هادي سنتين وعجبني بزاف,علاش؟ حيث كيف ما قلتلكم حتى انا من البنات اللي كنت اكره استخدام الواقي من الشمس حيث مكنحملش وجهي يكون ذهني ويتلصق.



Daylong يجي عبارة على حليب خفيف, القوام ديالو جاري شويه يسهل الاستخدام وحتى البشرة كتشربو دغيا وكتحسي وجهك مرطب مزيان ,وهو مناسب لجميع انواع البشرة وخصوصا البشرات اللي كتكون عندها حساسيه من التعرض للشمس,انا بشرتي مختلطه لذهنيه ووافقني المنتج واللي يصلاح تستعملوه حتى على جسمكم .
كيحميلي وجهي من الشمس وصراحه كنستعملو لايديا كذلك.



المنتج مضاد للماء وتقدري تستخدميه اثناء السباحه وكاين منه اصدار للاطفال كذلك.

 البنات خاص باش تعرفو فعالية اي واقي من الشمس وتستافدو من الحمايه خاص تحتارمو الاشياء اللي عنقولكم:
*اولا ضروري تستعمليه على وجهك قبل ماتتعرضي للشمس على الاقل ب 20 دقيقه,علاش؟ حيث خاص البشرة تتشربو مويان ويقدر يحميلك البشرة ديالك حتى ايلا تعرقتي حيث ملي كتشربو البشره صعيب يتمسح مع التعرق.
*ضروري اعادة استخدام واقي الشمس كل فترة على مدار اليوم.
*استخدمي واقي من الشمس مناسب لنوع البشرة ديالك.



وفقط هذا موضوعي لليوم
نتمنى يكون نال اعجابكم واستفدتو منه.
اي استفسار خليوه فالتعليق

Monday, April 3, 2017

منتجات أنهيتها - Mes produits finis♡




السلام عليكم ورحمة الله
مرحبا بنات
اليوم موضوع خاص بالمنتجات اللي انهيتها في الفترة الاخيرة
بلا مانهدرو بزاف ندخلو فالموضوع

غنبدا لكم بالعطور
اول عطر من مجموعة محاسن اللي نت وريتكم من فترة
هاد العطر من العطور العربيه,ريحته زوينه بزاف فواحه وتبقا لفترة طويله
غير تسالي اللي عندي غنرجع نشريه حيث يعجبني بزاف .


هاد العطر من افون حتى هو من العطور الزوينه اللي جربت من عندهم ثباته متوسط
مغنرجعش نشريه حاليا.


سبراي من فتوريا سكرت كيحمقني خفيف وغزال كنت كنستعمله غالبا فالبيت 
ثباته ضعيف دغيا كيمشي
مغنرجعش نشتريه.


جل دوش من ايف روشيه نفس مجموعة عطري المفضل من عندهم
معجبنيش بزاف جاتني الريحه مختلفه على العطر
مغنرجعش نشتريه


انهيت مزيلين مكياج
الاول من ايف روشيه اللي نصفه زيت والنصف الاخر ماء وتدمجيه
 زوين بزاف خصوصا لمكياج العين واخا منبغيش بزاف الزيت على الوجه ولكن هذا يستاهل نستحمله 

ثاني مزيل مكياج من دا بودي شوب سبق ونزلت عليه موضوع
ولكن  مغنرجعش نشريه حيث بالمقارنه مع الثمن والفعاليه كاين منتجات احسن


الزيت الاساسي للخزامى كيعجبني بزااف يرخي الاعصاب وكيخلي ريحه زوينه فالبيت


هاد الشمبوان كتشوفوه دائما ههه منحتاجش نتكلم عليه 


كريم للوجه من غارنييه
كان كيعجبني فالاول ولن مع الاستعمال رجعت نحس بيه كيرجعلي وجهي عامر بدهوان فلازون T والمناطق اللي تحتاج ترطيب كتبقا جافه.
مغديش نرجع نشريه اكيد


صابون اسود او صابون بلدي
عادي جدا كيف اي صابون مفيهش اي حاجه مميزه


اخر منتج هو كريم للجسم من بات اند دابودي وركس
ريحته خياليه زوينه بزاف, والترطيب مزيان 
غنرجع نشري من هاد الماركه ماشي ضروري نفس الريحه .


منتجين اول واحد كريم للترطيب زوين بزاف استعملته ثلاث مرات وحسيت بيه يرطب مزيان
ثاني منتج هو باتش للنف لازالة الرؤوس السوداء مابيهش ينضف ولكن ميحيدش 100% الرؤوس السوداء


لهنا موضوعي انتهى نتمنى يون اعجبكم
الى اللقاء

Friday, March 17, 2017

ماسكات الوجه القماشيه The Cure من pharaxel♡

السلام عليم فتيات
شكون فينا معزيزش عليها تدير ماسكات وتسترخي وتعطي اشراقه للبشره ديالها؟
اكيد كلنا كنبغيو نديرو هدشي ولكن فاوقات كثيره كيجينا الكسل
مكنقدوش عاد نوضو نديرو ماسك ونخليوه وعاد نغسلوه
للذلك اليوم جيتكم بماسكات من القماش زوينين بزاف ساهلين وميحتاجوش مجهود اهم شي ههه
الماسكات كورية الصنع اسمها The Cure من pharaxel
توصلت بيها من فترة 
الماسكات قماشيه تجي على حسب شكل الوجه وكتكون مليئه بمواد مرطبه و مغدية للبشرة
كل ماسك عنده خصائص مختلفه



الماسك الاول بالالوفيرا ومواد اخرى اللي المفروض انه يرطب ويغذي البشرة ويفتح لونها وتبان اكثر اشراقا


طبعا شكون فينا اللي مكتعرفش الكولاجين واللي فوائده مهمه للبشرة يحييها وكيرجعلها المرونه والقوه ديالها

هاد الماسك الاخير يعطي بشرة جميله ويفتح لونها


الماسكات زوينين بزاف, كتلاحظي الفرق بعد الاستخدام وكيف قلت الاستعمال سهل جدا
من الاحسن قبل ما تستعملي الماسك ديري مقشر لبشرتك باش تستافد من الماسك
خلي الماسك على وجهك من 20 الي30 دقيقه من بعد ما تحيديه اعملي مساج خفيف للبشرة حتى تشرب داك الماده اللي بقات من الماسك.

الماسك الثمن ديالو 65 درهم تلقاوه فالبارافارمسي

ايلا سبق وجربتو هاد الماسكات متنساوش تشارونا تجربتم

Related Posts Plugin for WordPress, Blogger...