Routine de soir | روتيني للعنايه قبل النوم ♡

مرحبا فتيات

نتمنى تكونو بالف خير وبصحه جيدة

اليوم موضوعنا غنقدم لكم فيه روتيني قبل النوم وغدي نوريكم بالتفصيل المنتجات اللي كنستخدم فهاد الفترة

كالعاده فأي روتين لازم نحيدو المكياج وانا لهاد الغرض كنستخدم منتجين اثنين كل مرة على حسب الرغبه ديالي

اول منتج لي كنت هدرت لكم عليه بالتفصيل فتدوينه هنا وهو مزيل مكياج من نيكتاروم

ثاني منتج من Byphasse اللي هو عبارة عن مياه eau micellaire اللي حتى هو استخدامه كيف الاول كنديرو فقطن وكنمسح وجهي,زوين كيحيد المكياج مزيان معمرني جربته مع مكياج ضد الماء,عيبه انه من بعد استعماله كتحسي بوجهك كيتلصق يعني لازم يا تغسليه او ترشي على وجهك ماء الورد.

هاد الخطوه غالبا كنديرها دائما ماعدا اذا جاني العجز ومكان فيا اللي يمسح,كندير واحد من هاد المنتجات سواءا كنت دايرة مكياج او لا.

ثاني خطوة كنديرها هي كنستخدم غسول للوجه وهاد الخطووه كنديرها فقط اليوم اللي كنكون دايرة ميك اب

كنستخدم غسول الوجه والفرشه الخاصه بالوجه اللي سبقلكم وشفتوهم فموضوع سابق هنا

الغسول من بوندز زوين بزاف وكينقيلي وجهي وفنفس الوقت مكنحس بوجهي جاف .

الخطوه التاليه فروتيني هي العنايه والترطيب: للوجه والعنق ديالي كنستخدم زيت ارغان من Argan&sens كترطب الوجه وكتحيد الشوائب واثار الحبوب من الوجه,كنستخدمه كذلك لمحيط العين حيث كتحارب التجاعيد.

لمحيط العين كنستخدم هاد المنتج اللي توصلت بيه من Christian Breton هو سيروم المفروض لترطيب وازالة التجاعيد المحيطه بالعين المهم منتكلمش لكم عليه بزاف حيث غدي نديرلو موضوع خاص.

وكذلك من نفس الماركه مسكرا لونها ابيض هي عبارة عن منتج للعنايه وتطويل الرموش وااللي نقدر نقولكم عليها انها رائعه.

اخر منتج للشفاه هو مرطب خاص بالشفاه من افون زوين بزااف ريحته وترطيبه روعه,عيبه الوحيد هو التعليب دياله الماده كتخرج بصعووبه لوكانت فشي علبه اخرى كاان يكون اسهل.

الخطوه ماقبل الاخيرة هي الشعر اول حاجه كنرش على شعري هاد السبراي من Macadamia اللي توصلت بيه BloomingBox, مزال خاص نزيد نستعمله باش نعطي رأي صحيح عليه ولكن الحاجه الاوليه لي نقدر نقولها ان ريحته زوينه بزاف.

من بعد ما كندير هاد السبراي كنسرح شعري بالمشيطه اللي تكلمت لكم عنه بالتفصيل هنا,كنسرح شعري مزيان مكنخلي فيه لاعقد لا والو, وكنبدا اخر خطوه اللي هي زيت المونوي من ايف روشيه كنستعمله باش كيخليلي هديك الرائحه الزوينه فشعري

غالبا يا كنعس بشعري مطلوق او كندير ظفييره.

اخر خطوه قبل ما كندخل لفراشي هي ترطيب الجسم 

لذلك كنستخدم كريم Ultra doux من غارنييه لي ترطيبه غزااال وريحته خفيفه وسبق وهدرت عليه هنا

للايدين والرجلين هادالفترة ديال البرد كنستعمل Glysolid المنتج الماده دياله تقيله وترطيبها اقوى مناسب فهادالفصل.

لهنا يكون موضوعي انتهى

نتمنى يكوننال اعجابكم واستفدتو

قولولي نتوما شنو المنتجات اللي كتستعملو قبل النوم؟