العناية بالمنطقة الحساسة♡

السلام عليكم حبيباتي

اليوم جيتكم بموضوع مختلف على دكشي اللي موالفه كنقدم فالمدونه

موضوعنا اليوم غنقدم لكم فيه طريقتي في العنايه بالمنطقه الحساسه والمنتجات اللي كنستعمل وبعض النصائح

اول حاجه البنات من الضروري استعمال ملابس داخليه قطنيه,علاش؟

حيث الملابس القطنيه كتمتص هداك العرق والافرازات اللي كتكون ومكتخليش يبقا هاد المكان رطب وبالتالي كتمنع ان لون المنطقه يتبدل. ومن الضروري ان هذه الملابس تكون مريحه,وتغييرها كل فترة وبعد الخرجات وايلا تعرقتي.

خاص ضروري كلما تدخلي للحمام تغسلي المنطقه وتنشفيها مزيان باش تفاداي تكاثر البكتيريا والجراثيم,ديما يكونو عندك فوط صغيرة خاصه بهاد المنطقه وتتغير باستمرار ماشي تخليها حتى توسخ.

بالنسبالي عندي جوج ديال الغاسولات الخاصين بالمنطقه الحساسه واحد كان سبقلي ونزلته فالمدونه فمفضلاتي والاخر خرجاتولي الدكتوره ديالي, ولكن بالنسبه ليا كنفضل سافوريل كيعجبني بزااف خفيف على المنطقه الحساسه وكيخلي واحد الريحه خفيفه وزوينه بزااف.
كيفما هو معروف متستعملوهمش بزاف انا ايلا كثرث ثلاثه ديال المرات فالاسبوع المهم تجنبو تستعملوهم يوميا

كنستعمل مره فالاسبوع الخزامى ,كنطيبها فالماء مزيان حتى كتغلي ومن ثم كنصفيها وكناخد هداك الماء كنتوضأ به,الماء يكون دافئ ماسخون ما بارد,من المعروف ان للخزامى فوائد كثيرة انها كتطهر وكتخلي ريحة زوينه بزااف غير انها كتحيد البرد,هاد ماء الخزامى كنستعملو حتى فأيام الدورة كنتوضأ بيها كل يوم من الدورة.

وتقدرو حتى تشربوها زوينه للبرد بزاف.

بالنسبه للملابس الداخليه انا كنغسلها بصابون الحجره وضروري تشللوهم مزيان ويتعرضو للشمس لمده مزيانه باش كتقتل الجراثيم اللي تقدر تكون بقات .

من الضروري ازالة شعر المنطقه باستمرار متخليهش يكبر حيث كيفما هو معروف فهو كيزيد نسبة تكاثر البكتيريا والجراثيم والاوساخ.
وانا كنستعمل الفوط الصحيه اليوميه براتيك بزاف خصوصا للبنات اللي كيخدمو ومكينش كيفاش يبدلو الملابس الداخليه خلال اليوم هاد الفوط سهل تغييرهم واكيد من الضروري تغييرهم كل فترة متخليوهمش بزاف.

هذا موضوعي لليوم نتمنى يكون اعجبكم واستفدتو منه

متنساوش تشاركوني بتعليقاتكم