Mes Produits finis - منتجات انهيتها

السلام عليكم ورحمة الله وبركاته بنوتاأأأأأأت ♥♥
كيف راكم مع البرد 

 اليوم جبتلكم موضوع يخص المنتجات اللي ساليتها 

وهاد الشهر كانت عندي مجموعه لا بأس من المنتجات 

وقررت نهدرليكم على تجربتي والرأي ديالي فكل منتج 

نبداو بصوره للمنتجات ==>

نبداو بمنتجات العنايه باليدين:

Silk Beauty Hand Cream

الكريم من اوريفلام غني بالبروتينات و مستخلصات الاورشيد ..ريحته معجبتنيش بزااف هي الرائحه ماشي قوية ولكن لم ترق لي

بالنسبه للترطيب  ...... الكريم فانبوب كبير 150 مل يعني كيبقا لفتره كبيره غير هو كبير مكينفعش تهزيه معاكي فالحقيبه ديالك

غدي نرجع نشريه او لآ : لا معجبنيش بزاف او بالآحرى موصلش لدرجة الترطيب اللي بغيت وحتى الرائحه ديال الكريمات او المرطبات بالنسبه لي لها عامل في اختياره

-Beauté des mains :Yves rocher

هاد الكريم ومثل جميل منتجات ايف روشي من مستخلصات نباتيه .. الكريم كان جاني هديه من المحل .. وبقا عندي لفتره كبيره بدون ما نستخدمه ولكن بمجرد ما استخدمته عجبني ..الترطيب دياله بالنسبه لي هو اللي كنحتاجه ليدي الكريم sans paraben وريحته ماشي قويه منقولكمش معجبتنيش ومنقولكمش عجبتني الريحه عاديه مزعجتنيش.

غادي نرجع نشريه او لآ: حاليا لآ حيث بغيت نجرب منتجات أخرى ولكن كنصحكم بيه .

*منتجات الآقدام:

-Beauté des  pieds: Yves Rocher

عجبنيييييي .. فيه حبيبات كبيره شويه كتساعد فازالة الخلايه الميته من القدم .. كنت محتاجاه خصوصا فالفتره ديال الصيف رجلي كانو كيعانيو, وهو بصراحه ساعدني بزاااف .. وفوق هادشي ريحته ديال الخزامى وانا من الناس اللي كتعجبهم ريحتها بزاااف 

غادي نرجع نشريه او لآ: أه ان شاء الله ومن المنتجات ديال Yves Rocher اللي كنصحكم تجربوها.

*منتجات العنايه بالوجه:

-Dual core Foundation : Oriflame

كريم اساس عباره عن ستيك ..ميزته انه كيغطي عيوب البشره مزيان و لكن عيبه انه مكيبقاش فالوجه لفتره كبيره 

غادي نرجع نشريه او لآ: لا حيت بغيت نجرب كريمات اساس اخرى بميزات افضل

-Essentials : fairness cream :Orifalme

هو في الآساس كريم لتفتيح البشره ولكن مكيفتحش البشره ههه ولكن كيرطبها .. وكنستعمله للترطيب فروتيني اليومي وحتى قبل المكياج و فعلا زووين بزااف

-Pure calmille Gel Nettoyant : Yves rocher

منظف للوجه بمستخلصات البابونج .. انا كنستعمله يوميا و خصوصا اني مكنحس ان بشرتي نقيه غير ايلا غسلتها بالماء

طبعا رجعت شريت منه بلا مانفكر هه

-Essentials tropical fruits exfoliating gel : Oriflame

مقشر للوجه من اوريفلام غني بمستخلصات الفواكه .. ريحته زويينه بزااف .. كنت كنستخدمه اسبوعيا وهو صالح لجميع انواع البشره الحبيبات دياله مكيوجعوش فالوجه ولكن كيقومو بالعمل ديالهم ..فيه 150 مل وانا بحكم استخدامي ليه مره اسبوعيا بقالي لفتره طويله.. اللي نقدر نقولكم عليه هو انه جل مقشر زوين بزاف ووافق البشره ديالي خصوصا ان بشرتي مختلطه ومرات كيكونو مناطق عندي جافه ومرات عاديه.

غادي نرجع نشريه او لآ: مرجعتش لقيته فاوريقلام كنظن انه كان اصدار محدود ولكن ايلا لقيته غدي نرجع نشريه

-Pure skin : Oriflame

منظف للبشره للاستعمال اليومي .. طبعا للبشره الذهنيه وانصح به بشده ههه زوين بزاف للبشره الذهنيه .. ايلا كانت بشرتكم مختلطه بلا متستعملوه حيث غدي ينشف المناطق الغير ذهنيه 

غادي نرجع نشريه او لآ: 

*منتجات للجسم:

-Fruit cocktail shower gel : Oriflame

ريحته زوينه لما كتشميها من العلبه ولكن غير كديريه مكتبقا لا ريحه لا والو فالجسم .. يعني كيف درتيه كيف لا .. 

غادي نرجع نشريه او لآ: لا طبعا

*منتجات الآظافر:

-Nail Polish Remover : Essence

مزيل الآظافر من ايسونس .. جاني عادي مفيهش شيحاجه مميزه غير انه Sans Acetone ..  واللي معجبنيش فيه اكثر هو ريحته قووويه بزااف .. حاليا مغنرجعش نشريه بغيت حتى نسالي مزيلات الآظافر الآخرى اللي عندي.


ومن هنا كانكون ساليت الموضوع ديالي
وكانتمنى نكون فدتكم شوية
ونتوما كذلك يلا جربتو شي منتج من هاد المنتجات ما تبخلوش تشاركونا
بيزوووويات :* :* :* ♥♥